Cynllun cyffrous yw Cyfrwng ag iddo dair elfen, sef cyfnodolyn aml-ddisgyblaethol newydd a gaiff ei gyhoeddi'n flynyddol gan Wasg Prifysgol Cymru, cynhadledd deithiol a gynhelir bob mis Ebrill, a'r wefan fywiog hon.
Nod Cyfrwng , trwy gyfrwng y tair elfen hyn, yw darparu fforwm ar gyfer cyflwyno ymchwil a thrafodaeth ysgolheigaidd ar y cyfryngau yng Nghymru, yn bennaf ffilm, teledu, radio, cyfryngau newydd, newyddiaduraeth ac astudiaethau perfformio a theatr.
Gwobr Goffa James Thomas
Braint ac anrhydedd i Cyfrwng yw gallu cyhoeddi cystadleuaeth Gwobr Goffa James Thomas. Roedd Dr James Thomas (1971–2007) yn un o gyd-sylfaenwyr Cyfrwng ac yn gyd-olygydd tri rhifyn cyntaf y cyfnodolyn.
Fel cydnabyddiaeth o'i gyfraniad a'i weledigaeth, y mae Cyfrwng yn falch o gyhoeddi bod gwobr flynyddol wedi ei sefydlu yn ei enw er mwyn annog myfyrwyr ôl-radd ac ysgolheigion ar ddechrau eu gyrfa i gyfrannu i’r trafodaethau ar gyfryngau Cymru trwy ymchwilio, ysgrifennu a chyflwyno ysgrif i’w chyhoeddi yn Cyfrwng.